上年全球受肺炎影響，好多國家都實施社交距離措施，唔少人都留喺屋企避疫及work from home，從而造就更多機會被騙子乘虛而入。根據美國聯邦貿易委員會 (Federal Trade Commission)最新統計資料，上年美國網上情緣騙案創下歷年新高，共錄得3萬多宗騙案，總共有3.04億美元被網絡騙子呃走，受害人金錢損失中位數約2500美元。

（圖片來源：美國聯邦貿易委員會）

隨著大家被迫留喺屋企，心思思咁打開交友Apps或其他網上社交平台搵人吹水解悶，騙子就有機會乘虛而入。據了解，騙子經常喺網上搵張靚仔/女相加個假名就開始招搖撞騙，利用網戀之名再呃受害者錢，通常同受害人傾咗一排之後，就會同佢講自己有緊急醫療情況需要錢，又或者會講因為肺炎搞到財困需要錢應急等博同情說話，從而騙取金錢。

美國好似好遠唔關自己事？其實近年香港網上情緣騙案都有上升趨勢。據RTHK報導，上年首10個月裸聊勒索及網上情緣騙案，較去年同期分別急增3倍及5成。有唔少騙子會假扮成靚女喺網上搵人同佢玩裸聊，從而錄低受害人畫面繼而勒索，要脅受害人如果唔畀錢就會Send條片畀曬佢親朋好友及同事，當中最大一單案件呃咗成33萬港幣。

除咗男士衰咸濕中裸聊勒索外，亦有女士被假扮成專業人士嘅騙子呃。通常呢啲騙子就會假扮成係商人、住喺外國嘅專業人士，用曬英文同受害人傾計，取得受害人信任後就開始推銷各種投資計劃，當然啲錢就一去無回頭。都係個句啦，網上交友要小心，關乎到錢銀問題切勿掉以輕心。