鱷魚鞋Crocs曾經於香港紅極一時，但係好快又被嫌棄太膠同外型太唔吸引，相信而家出街你都好少見到有人著。不過其實呢對膠膠地嘅鞋近年已經開始轉型，並好大膽咁走入Fashion世界，但卻意外地受落，特別係歐美地區。

從近期推出嘅Crocs鞋款，其實已經不再單調，顏色玩味感極重，好似唔同顏色嘅大理石花紋，又加入Jibbitz™ 鞋飾令鞋嘅變化更多，令人覺得著住Crocs已經唔再好似以前咁老土。

唔單止咁，Crocs更聯同巨星大玩Crossover，就好似早前與Justin Bieber 個人品牌Drew House合作推出獨家Crossover鞋款，薰衣草色嘅Clog配有有巨型Jibbitz™飾扣，靈感源自多個Drew House嘅標誌性圖案，呢款鞋一出第一日已經被搶購一空。

另外，Crocs亦搵黎唔少韓國當紅組合合作，好似Blackpink、 BTS及Twice，令呢個品牌起死回生，成功打入潮流品牌之列。雖然喺香港現時黎睇Crocs要翻生未必咁易，但食住個勢有一日再見到成街都係呢對鱷魚鞋都唔係無可能。