日本男神木村拓哉細女木村光希（Kōki），早前獲邀擔任意大利時尚品牌VALENTINO 2021春夏新裝代言人，卻因為宣傳照及影片出現疑似踩和服腰帶行為遭炮轟，其後VALENTINO緊急下架相關影片，並發聲明道歉表示塊布唔係和服腰帶，完全無褻瀆日本傳統文化意圖。

從宣傳照可以見到，木村光希坐咗喺鋪有和服腰帶嘅地石上，擺晒Pose咁影相，更著住高趾鞋踩上和服腰帶。

削除された(You Tubeは非公開？)動画↓ pic.twitter.com/jqo22oEjjR

— 三月兎(手洗いうがい疫病退散) (@marchrabbit0615) March 29, 2021

除咗「踐踩」和服腰帶之外，更有網友喺宣傳片發現木村光希著住鞋行入一間日本房屋，犯咗日本人大忌，又或者可能木村光希鬼妹仔性格，所以唔知或唔理呢啲基本嘢。大部分日本網友睇完都非常不滿，表示「令我覺得日本文化被踐踏」、「如果和服腰帶師傅睇到會激死」、「和服腰帶唔係坐墊或地毯」等等。

pic.twitter.com/CgDRgohcHB

— Valentino (@MaisonValentino) March 30, 2021

VALENTINO好快就將相關宣傳片下架，並發出道聲明並澄清個塊布唔係和服腰帶，令大家聯想到和服腰帶非常抱歉，同埋強調VALENTINO好尊重全球各地不同文化個啲官腔嘢啦。不過大部分日本網民就覺得呢個道歉聲明好無誠意，認為VALENTINO似乎用「布有相似」呢一點卸膊，表示「問題唔在於塊布係咪真係和服腰帶，而係有個人確實踐踏緊呢塊和服腰帶嘅布。更有網友留言從布料形狀、顏色、寬度等多方面質疑塊布除咗係和服腰帶之外就無其他可能性。

官方表示輯相係從已故日本導演寺山修司嘅作品《草迷宮》獲得靈感，不過結果好明顯適得其反。有網民就發現，呢輯相係由定居日本嘅華裔女攝影師張馨怡（Fish Zhang）操刀，曾為小松菜奈等名模拍攝。

資料來源：はちま起稿、ゲーム攻略wiki