Marvel於香港時間昨晚深夜公佈《Shang-Chi and the Legend of the Ten Rings (港譯：尚氣與十環幫傳奇)》嘅首條預告，睇完你唔會知套戲講啲咩、你亦未必講得出主角個名，但你一定會感嘆：梁朝偉真係好_有型！

《Shang-Chi》預期今年9月3日於戲院上映，主角係主演喜劇《Kim's Convenience》而聞名，但本身都係個特技演員嘅加拿大籍華裔演員Simu Liu (劉思慕)飾演主角「Shang-Chi」，而梁朝偉就飾演佢老豆、恐佈組織十環幫首領文武 (aka 滿大人)。先唔講條預告講咗啲咩，呢篇文主要係吹奏梁朝偉究竟有幾靚仔！先係今年58歲嘅佢，拍埋琴日先啱啱滿31歲嘅劉思慕隔離完全唔似佢老豆 (讚緊)，而其中一秒梁朝偉以古裝上陣抬頭一望嘅鏡頭，已經型到裂呀！不過值得留意嘅係，預告前段旁白似係梁朝偉個角色講嘅，但把聲就唔似係梁朝偉，莫非電影會為佢重新配音？

除劉思慕及梁朝偉外，電影仲有Awkwafina、楊紫瓊及陳法拉等香港人熟悉嘅演員，不過後兩者暫時未有於預告中現身。

《Shang-Chi》原作乃係參照李小龍而創作嘅超級英雄漫畫，主角Shang-Chi自少就由到爸爸「滿大人」嚴格訓練而成為武術高手，希望有日佢會繼承衣缽，不過Shang-Chi就決定反抗爸爸嘅安排，簡單黎講就係一個「仔打老豆」嘅故事——唔知北方某國會唔會覺得佢意識不良——同時因為係以武術為主，所以預告都能見到唔少精彩動作場面，頗有幾分當年港產動作電影嘅味道，令人期待《Shang-Chi》會唔會成為Marvel電影中動作場面最出色嘅作品。