學著名武打巨星話齋，拍廣告呢家嘢，「你不能叫我拍、我就馬上拍。」至少都要試用過先決定接唔接拍。最近韓國女團Oh My Girl成員Arin就因為一輯廣告相引起熱議，佢有冇試完先拍就唔清楚，但就因為唔係著住套內衣嚟影相，而被網友鬧「唔稱職」、「太保守」，唔知大家又覺得有冇問題呢？

今年21歲嘅Arin自15歲出道以嚟，一向以可愛清新形象深受粉絲喜愛，最近因為接拍洪氏姊妹最新韓劇《還魂》而人氣急升，就連以前嘅內衣代言廣告相都被人摷出嚟講。Arin從上年3月開始為服裝品牌「BYC」代言，同其他內衣廣告女星唔一樣，Arin並無「親身上陣」，只係手持內衣影相，又或者企喺著上內衣嘅假人旁邊影相。

有網友就不滿Arin「唔稱職」、「太保守」、「內衣Model唔著內衣合理咩？」，更鬧佢唔想性感就唔好接內衣廣告。不過亦有網友認為無規定代言內衣廣告就一定要著內衣，而且買家100%係女性，男人睇完輯相唔高興又如何？唔知大家又覺得有冇問題呢？