早前法國探險家Christian Clot受疫情隔離生活啟發，聯同科學家展開一項名為「Deep Time」實驗，邀請15位介乎27至50歲嘅男女進入洞穴展開40日「禁閉式」生活。參加者無得用時鐘、智能手機、互區網，而且彼此事前互不相識。與世隔絕多日後，佢哋終於重見光明，大部份參加者失去時間概念，仲以為實驗提早結束。

15名志願者由8男7女組成，分別嚟自不同界別，需要喺溫度約12°C、相對濕度為98%嘅山洞渡過40日「禁閉式」生活。實驗期間，唔少人都選擇跑步同探索洞穴打發時間，洞內亦設有一部好似健身單車咁嘅發電裝置，參加者需要透過踩單車發電，取水。

洞外研究隊團透過各式各樣感應器監測著15人嘅睡眠週期、社交活動及行為反應，其中有款小型溫度計好似藥丸咁細粒，參加者吞服後，該溫度計就會測量志願者體溫數據並傳送到電腦，最後自然排出。

近日，15名志願者終於經歷完40日實驗，走出洞穴重見光明。由於喺洞穴生活多日，各人離開洞穴時都要戴上太陽眼鏡保護雙眼。每個人都有唔同程度嘅時間概念缺失，普遍嚟講大部份人都以為實驗提早結束，唔覺得已經過咗40日，更有人覺得只係過咗23日。

該實驗共耗資約120萬歐元（約$1,120萬港元），旨在觀眾人類如何適應生活環境急劇變化，以及失去時間概念下嘅行為模式，相信好快就有正式實驗報告推出，結果應該會幾有趣。