繼《餃子》後，香港鬼才導演陳果再玩恐怖奇幻題材，以黑色幽默手法諷刺香港樓價荒謬現象，帶嚟新作《鬼同你住》。近日電影公司釋出前導預告片，模仿樓盤廣告介紹猛鬼凶宅，最後更忠告觀眾「凶宅價格可升可跌，當中涉及風險，買唔買，唔驚鬼先好買」，認真抵死。

預告片一開始就用上古典音樂配樂，旁白字字鏗鏘咁讀出對白「屹立黃金地段，坐擁翠綠園林，融合歐洲諾夫王朝...」，但畫面就全部都係鬼，抵死得嚟又符合陳果一貫黑色幽默風格。

《鬼同你住》由陳果自編自導，黃又南、邵音音、太保等人主演。故事採用三線發展，地產經紀阿源（黃又南 ）為咗豐厚佣金，明知係凶宅都落力Sell樓客上車，點知就被高佬鬼（車保羅）纏上；四姊妹（魏秋樺、文雪兒、麥家琪、李麗珍）為咗得到阿媽（邵音音）嘅別墅，日日都期求佢早日歸西；業主阿祥（太保）將唐樓改建成10幾間劏房出租，但小鬼強仔經常出現搞破壞...

陳果導演就表示，新戲反映香港樓價貴到離譜，唔係一般人住得起，戲名係參照「搵鬼住咩！」呢個口頭禪諗出嚟。希望以黑色喜劇拍出香港人為樓瘋狂，甚至末世嘅癲狂狀態，呈現市民不惜以低價買凶宅、明知有鬼同你住都要上車嘅荒誕，期望觀有共鳴。電影預計今年8月上映。

鬼才導演陳果一向以諷刺社會聞名，除咗以低成本拍電影之外，亦經常用新人或非專業演員擔任主角。當年所拍嘅「九七三部曲」至今仍然廣為傳頌，更憑當中嘅《香港製造》獲得金像獎及金馬獎最佳導演。