正所謂「小朋友先鍾意高達，真男人都愛渣古」，作為自護公國量產人型兵器（MS），渣古無高性能光束槍或浮游炮，得把槍仔都勇於踏上戰場捍衛心中嘅正義，就好似現實生活入面一眾無主角光環（父幹）嘅男士，喺社會上為著目標默默耕耘、努力拼博。最近萬代就以綠渣古為靈感，結合日本傳統工藝，推出南部鐵器綠渣古鐵水壺，懂得渣古浪漫嘅你，或許會鍾意呢件作品。

發源於岩手縣嘅傳統鑄造工藝「南部鐵器」始於1088年，當中最著名嘅「鐵瓶」（即係鐵水壺）以18世紀之前嘅茶壺改良而成，煲出嚟嘅水除咗口感順滑，而且仲充滿鐵質，非常適合貧血人士。今次作品由「水沢鋳物工業協同組合」工匠們經過一系列繁瑣工序鑄成，將渣古頭部用水壺完美結合，美觀又實用。

根據官方資料，「南部鐵器 鐵瓶綠渣古ZAKU（GREEN） 」重達2.475kg、容量約700ml，售價為27,500日圓（約$1960港幣），現於日本萬代官網開放預購。

資料來源：ファミ通、bandai.jp