每逢任天堂有大作推出，都會出返隻對應嘅amiibo公仔，除咗用嚟收藏之外，玩家可以掃瞄公仔嘅NFC晶片獲得特定遊戲道具，例如《MHRise》嘅amiibo就有特別外觀裝備同抽獎。今次任天堂新作《薩爾達傳說：禦天之劍HD》，就將遊戲功能綁定喺amiibo身上，間接迫玩家買埋隻amiibo獲得完整遊戲體驗，即使遊戲未正式上市，隻amiibo已經炒到貴過隻Game。

基於遊戲機制，如果玩家想快速轉移到另一個地方，只可以從特定嘅傳送點來回移動，新作《禦天之劍HD》亦唔例外。但如果玩家課金買多隻「 薩爾達 & 洛夫特飛鳥」amiibo公仔，就可以突破限制，隨時隨地離開地面，慳返行去傳送點嘅時間。雖然任天堂都試過喺《薩爾達傳說黃昏公主HD》amiibo綁定一個高難度關卡，但今次就係第一次綁定遊戲功能，加上過往amiibo定位為「獎勵性質」產品，所以唔少玩家都不滿今次做法，認為咁做同迫人買冇分別。

當大家仲鬧緊任天堂嗰陣，ebay就開始出現炒賣情況，將原價為$25美元嘅「 薩爾達 & 洛夫特飛鳥」amiibo，炒到近$70美元，仲貴過隻Game（$59.99美金）本身。唔知大家對今次任天堂特別賺錢技巧又有咩睇法呢？

The amiibo is already being sold for more than the game, that was fast pic.twitter.com/WpI8tvYa4b

— Spawn Wave (@SpawnWaveMedia) May 23, 2021

順帶一提，《薩爾達傳說：禦天之劍HD》將於7月16日正式上市，有興趣嘅朋友請密切留意。