只要你早年有留意過任何遊戲直播，甚至只係睇過達哥你就一定知道Twitch呢個直播平台。以前Twitch就只容許遊戲直播，但早年開放「Just Chatting 」類別之後，就開始出現大量以泳裝上陣、浸喺浴缸浴池之中同觀眾「傾計」嘅直播主，令到一眾Twitch用家不滿。而Twitch方面亦於近日正式回應用家嘅不滿——開放「Pools, Hot Tub and Beaches」專區，簡單黎講就即係「泳裝直播合法化」。

所謂「泳裝直播」即係呢啲

Twitch於上週正式開放「Pools, Hot Tub and Beaches」，簡單黎講就係只要你係著泳裝、坐喺各類水池、浴缸中做直播，就屬於呢個專區嘅內容。Twitch喺官方Blog中都講得非常直白，「社群同廣告商嘅反應，令我們清楚要有更多方法去控制推薦內容，以及廣告放置嘅位置」，亦即係話Twitch其實係知道觀眾同廣告商都唔鍾意「泳裝直播」，而新專區就係Twitch滿足觀眾以及廣告主嘅期望，同時又保留「泳裝直播」嘅折衷辦法。

著名網紅Amouranth (Belle Delphine) 就係Twitch其中一個、甚至可以話係最紅嘅「泳裝直播主」，佢甚至曾經出售佢浸過嘅浴缸水

在 Instagram 查看這則貼文

Amouranth | MEMES NINJA（@amouranth）分享的貼文

咁點解唔直接禁咗泳裝直播？Twitch於Blog文中就話雖然平台上對裸露身體有限制，但「人哋覺得直播主性感並不違反限制，而Twitch不會因為任何女性，或任何人有吸引力而採取任何行動」，所以只要「合情合理」——例如喺泳池著泳衣——又冇露點，都唔算係有問題。而Twitch冇講嘅另一個原因，就係「泳裝直播」的確吸引到唔少觀眾，而且係一班會課金支持心儀直播主嘅觀眾，所以對於Twitch黎講都係一班重要客群。

不過Twitch亦有講明「Pools, Hot Tub and Beaches」專區只係一個暫時性方法，未來會繼續完善。至於佢能夠唔夠搵到平衡，定係會叉錯腳跌到變成人台，就要睇未來嘅發展啦。