唔少發達國家都面對人口老化問題，有人就「鼓勵」班自己都未必養得掂嘅人民去生第三個小朋友，而日本方面亦推出唔少政策鼓勵生育，甚至民間企業都為員工提供相應福利。例如日本Yahoo!最近就宣佈容許員工最長休假一年以治療不孕，而且不限於已婚女員工，就連未婚、男員工都可以申請。

圖片：Yahoo! Japan

Yahoo! Japan 指經調查發現，有95.6%受訪者認為要一路返工一路治療不孕問題非常困難，所以有一半人會為咗專心治療而選擇辭職。有目及此，Yahoo! Japan 宣佈推出「Pregnant Support休假制度」，簡單黎講就不論性別以及婚姻狀況，員工都可以「治療本人嘅不孕問題」為由向公司申請最長一年休假，休假期間停薪留職，搞掂你就可以返黎繼續返工。而且按照不同需要，員工可以將一年假期最多分開三次放，每次相距最少一年。另外亦會於公司設立由人事部及看護員共同組成嘅專責小組，方便員工申請假期以及諮詢不孕治療相關事宜。

Yahoo! Japan有講到明，如果你喺在職期間要去接受不孕治療又或者成功懷孕後要去產檢，公司係會提供有薪病假，換言之「Pregnant Support休假制度」會為想專心治療不孕嘅員工提供更大彈性，你要一路返工一路睇醫生都係冇問題。唔知大家又覺得呢個制度有冇用呢？