曾經有人講過，男人努力獲得金錢、知識、權力，最終都係為咗吸引女人，但你又有冇實際諗過女人會被啲咩特質嘅男人吸引先？你以為女人一定係睇樣睇錢咁膚淺？咁你就錯啦，根據澳洲昆士蘭科技大學及新南威爾斯大學嘅一個聯合研究，錢對吸引異動根本唔重要，而且比起女人，我哋呢班麻甩佬要膚淺得多！

兩間大學收集超過7000名18至65歲澳洲男女嘅擇偶條件後，發現女性對「教育程度」、「智力」及「情感聯繫」嘅評分要比男性高得多 (每項平均高9至14分，100分滿分)；而男性對於「外貌 (包括身材) 吸引力」嘅評分就遠高於女性。換言之女性會傾向睇內在，而男人就傾向睇外在。呢個發現亦符合進化論中「女性要搵個照顧到佢同下一代嘅人，男性要搵個靚嘅人繁殖下一代」嘅觀點。

但要留意返，女性們睇嘅係「照顧」，而唔係單純嘅金錢。實際上研究發現，無論邊個性別、邊個年齡層都好，收入都唔係最主要嘅擇偶條件，研究團隊甚至將收入列為「不重要因素」。所以金錢嘅影響力似乎冇大家想像中大。

該研究嘅另一項有趣之處，係發現不論男女，都會有一部份嘅人唔單止對某一項特質嘅要求高，而係對所有特質嘅要求都高——用返人話講，就即係一班眼角極高嘅人——不過研究團隊就拒絕用「奄尖 (Picky)」黎形容呢班人，而係用「緊張 (Intense)」黎。據研究指，「緊張」嘅男性主要出現於20-40歲，但「緊張」嘅女性主要出現於35-50歲。

而只要過咗55歲，不論男女，對於另一半嘅外貌要求都會大減，而轉向性格等其他特質。

資料來源：Brisbane Times