今年4月Netflix就宣布同傳奇影業合作開拍《高達》真人版電影，各位高達迷除咗擔心會唔會玩爛經典之外，同時亦非常好奇佢哋究竟會改編邊一套作品。近日導演Jordan Vogt-Roberts透露，今部作品主要係畀從未睇過《高達》嘅人睇，或者會由多條時間線混合而成，希望「新人」睇完會有機入坑。

近日導演Jordan Vogt-Roberts接受《Entertainment Weekly》訪問時透露，今部電影旨在畀從未睇過《高達》，或者唔知從邊到開始睇起嘅人，提供一個切入點。對於本來就係高達粉絲嘅人嚟講，睇完亦都可能會有呢種感覺「呢套就係我想睇到嘅高達！」。另外，佢亦表示今次作品可能會由唔同時間線、唔同事物混合而成，但全部都係取材於《高達》吸引人嘅地方，希望「新人」睇完會有機會入坑。

（圖片截自：Entertainment Weekly）

Jordan Vogt-Roberts認為《高達》係一部講述戰爭剝奪公民權、世代鬥爭嘅作品，當中嘅人物關係、愛與衝突劇情處理甚至超越動畫本身嘅驚人動作場面，希望可以用一種前從未有嘅方法喺大銀幕上重新呈現呢套作品。

高達真人版概念圖，圖片來自電影《Ready Player One》。（圖片截自：IMDB）

Netflix《高達》真人版電影由《金剛：骷髏島》導演Jordan Vogt-Roberts執導，《Runaways（離家童盟）》作者Brian K. Vaughan撰寫劇本。並由拍過《Godzilla vs. Kong （哥斯拉大戰金剛）》、《Pacific Rim: Uprising（悍戰太平洋2：起義時空）》、《Jurassic World: Fallen Kingdom（侏羅紀世界：迷失國度）》等多部CG大作嘅傳奇影業製作，電影目前正處於開發階段，上映日期同演員陣容都未有消息。