近年興起一股菲林相機熱潮，無論傻瓜機定係大部單反，都深受一班後生仔歡迎。Fujifilm就一早睇準商機，先後推出多部復古造型無反相機，配埋自家嘅模擬菲林功能，隨即成為文青必備用具之一。雖然近年Nikon靠Z系列無反相機殺出一條血路，但面對著Canon、Sony、Fujifilm等大廠夾擊，銷量仍然不及對手。最近就有傳Nikon打算推出一部「復古風」無反相機救市，外觀類似自家經典菲林相機Nikon FM，採用銀黑雙色機身，全機械式轉盤，軍艦部份更搭配黑色皮革作裝飾。

據Nikon Rumors消息人士爆料，新機可能唔會用數字做代碼，而係叫做「Zfc」或「Z-Fe」，外型睇落就好似數碼版嘅Nikon FM。機身頂部有多組機械式轉盤，分別調較ISO、快門速度及曝光補償，快門制旁邊仲有一個好細嘅螢幕可以顯示光圈值。

據目前傳聞，新機同樣採用APS-C畫幅以及Z-mount鏡頭卡口，規格將會接近2019年底推出嘅Nikon Z50。發布當日仲可能會推出兩支全新DX鏡頭「NIKKOR Z DX 28mm F2.8」以及「NIKKOR Z DX 35mm F1.8」，不過兩支新鏡就唔係復古設計，沿用舊有現代風格。Zfc嘅連鏡套裝好可能就會搭配上述其中一支鏡頭，雖然睇落好似非常唔夾，但實情就要睇過實物先知，更何況到時唔鍾意大可以轉接舊鏡使用。傳聞Zfc套裝售價為999美元（約$7750港幣），機身有銀色、黑色及啡色選擇，預計6月28日發表，7月底正式上市。