近年迪士尼掀起一股真人版電影翻拍熱潮，繼真人版《Mulan（花木蘭）》後，另一部經典作品《The Little Mermaid（小魚仙）》亦喺上個月正式開鏡。最近外媒就流出多張片場照，見到飾演女主角嘅黑人女歌手Halle Bailey身穿藍色潛水衣，疑似彩排緊小魚仙拯救王子嘅橋段，隨即引起一眾網友再次聲討。不過Halle Bailey就無視負評，連日喺IG曬性感泳衣照，流露出自信笑容。

人魚公主Ariel拯救Prince Eric一幕。（圖片截自：IMDB）

自從迪士尼公布真人版《The Little Mermaid（小魚仙）》由黑人女歌手Halle Bailey擔任主角，網絡上就充斥住各種討論，有人認為咁做係一種進步，打破舊有刻板印象，無論咩膚色都唔會影響劇情發展。不過有唔少人就認為黑人演員飾演紅髮白人嘅小魚仙係破壞經典，迪士尼應該忠於原著，同種族歧視無關，當中有網友就發起「#NotMyAriel」運動，要求迪士尼換人。不過單嘢嘈咗一排就冇晒聲氣，直至近日多張片場照流出，呢個話題又再次被人拎翻出嚟講。

從片場照可以見到，Halle Bailey著上藍色潛水衣坐係男主角Jonah Hauer-King旁邊，疑似彩排緊小魚仙拯救王子一幕，仲可以睇到Halle Bailey對腳有一條「人魚尾巴」。但以相中嘅排場同衣著，相信佢哋只係純粹係試位同彩排，並唔係電影最終造型。

在 Instagram 查看這則帖子

Halle（@hallebailey）分享的帖子

對於負面批評，Halle Bailey就好似已經習慣晒，連日喺IG曬出多張性感Bikini泳衣照，並流露出自信笑容。不過就算網友點反對都好，套戲已經正式開拍，換角機會微乎其微，咁唯有從票房數字證明迪尼士今次選角啱定錯，電影預計2022年上映。