無論西方定係華人世界，都對某啲數字特別敏感覺得唔老黎，例如華人世界好多樓就唔會有「4」同「14」層出現，而西方國家就唔鐘意「13」呢個邪惡數字。近日​美國調查機構SellCell做咗項統計，訪問3,050名Apple用戶如果下一代iPhone叫「iPhone 13」會唔會影響購買意欲，結果顯示有18.3%受訪者表示反感，更高達7成人希望下代iPhone可以改名。照咁睇嘅話，如果Apple考慮埋中國市場，應該「iPhone 14」都要改名，不過當年iPhone 4又好似好多人炒喎...如果畀大家改名，你哋又想改做咩名呢？

（圖片截自：sellcell）

結果顯示，對於新iPhone叫「iPhone 13」，有18.3%人表示會因為呢個名而跳過呢一代，但更多人（81.7%）覺得13冇咩嘢，唔會影響佢哋嘅購買意欲。有趣嘅係，受「13恐懼症」影響嘅用戶當中，男性佔24.9%，而女性就只佔11.7%，原來美國男人比女人更怕13呢個數字。

（圖片截自：sellcell）

而對於下一代iPhone叫咩名好，有74%人傾向改新名，當中最多人（38%）認為叫「iPhone（2021）」最為合適，不過都有26%人覺得唔使搞咁多嘢，照順序叫13就算，另外亦有7%人覺得可以跳過13，直接叫做iPhone 14。如果畀大家改名，你哋又想改做咩名呢？

資料來源：9to5mac、sellcell