近年Youtube充斥住各種以「X分鐘看完電影」為題嘅速食短片，甚至連小說、動漫、遊戲都有「速食」系列，創作者透過擷取電影片段將原本90-120分鐘嘅電影濃縮成幾分鐘短片，並加上個人旁白及描述，呢種行動一直以嚟充滿爭議，有人認為只係「二次創作」，亦都有人認為係侵犯版權。最近由日本多間電影及動畫公司組成嘅「內容產品海外流通促進機構（CODA）」就估計呢類短片造成片商每年損失約956億日圓，並表示將會採取法律行動。唔知大家又覺得呢類片究竟係「侵權」定係「二創」呢？

現代人生活繁忙，莫講話坐定定睇一套90-120分鐘嘅電影，就連睇套30分鐘嘅劇集都可能冇時間，更多人會選擇喺Youtube睇速食短片簡單了解劇情就完事。從而造就呢類短片猶如雨後春筍般出現，只要唔係講得太差，閒閒哋都可以過萬點擊率，各地創作者眼見商機滿滿，就紛紛加入務求分一杯羹。從幾年前只有小貓三四隻，演變到依家無論喺中國、台灣定係馬來西亞，都有大量Youtuber專做電影速讀系列，如果純粹以觀眾角度當然覺得正啦，有多幾個Youtuber可以選擇，但諗深一層就會發現呢類型短片可能對整個產業造成極大害傷。

幾年前台灣Youtuber「谷阿莫」就因為短片涉嫌侵權而賠上100萬新台幣。

最近日本CODA組織開始著手調查事件，發現近一年嚟有55個Youtube帳號共上傳多達2,100套速食短片，有部份短片更高達數百萬觀看次數，預計創作者每月因此而獲利數百萬日圓廣告收入。CODA認為呢類短片會搞到觀眾唔去畀錢睇電影，並估計對片商造成每年損失近956億日圓，尤其係依加電影業因疫情陷入水深火熱之中，大家都留喺屋企上網睇片，更加唔容許呢類短片乘機獲利。

除咗Youtube，中國各大短片平台都充斥住「x分鐘看完xx電影」短片。

目前CODA掌握嘅速食短片創作者，上傳嘅片除咗有《進擊的巨人》、《真·哥斯拉》以及《大逃殺》等日本電影，更發現佢哋連《Spider-Man》、《Joker》等荷里活電影都有份。並已向Youtube總公司所在地嘅美國法院提出申請，要求Youtube提供相關創新者個人資料，繼而交由警方起訴。當然，Youtube會唔會交出用戶資料係一回事，起唔起訴到又係另一回事，如果對方係其他國家嘅居民，要起訴就難上加難。不過值得大家思考嘅係，究竟呢類影片係屬於「二次創新」定係「侵犯版權」呢，當中又應該點樣定義？呢個問題都嘈咗好多年，一直都未有明確嘅答案，可能要留返畀個官去審啦。

資料來源：CNA