大部份第一次去東京玩嘅人，都會選擇去台場睇下高達，而台場嘅另一個人條景點，就係2003年開業、以日本下町為主題嘅大型溫泉設施「東京台場大江戶溫泉物語」。唔使離開東京市內就有溫泉浸，入面又有嘢買、有嘢食、有嘢玩、甚至仲可以平平地過埋夜，係咪未去過嘅想去下，去過嘅又想再去？不過Sorry，冇呢個機會啦，因為「東京台場大江戶溫泉物語」宣佈將於今年9月5日結業！

在 Instagram 查看這則貼文

【公式】東京お台場大江戸温泉物語（@daiba_ooedoonsen）分享的貼文

「東京台場大江戶溫泉物語」昨日於官網上貼出告示，首先多謝過去18年間每年100萬名曾經到訪嘅客人，然後就解釋到，「東京台場大江戶溫泉物語」喺台場塊地嘅租用期只係去到今年12月，而根據當年簽約時嘅條件，張約係冇得續嘅，而且合約完嘅時候係要還返塊空地出黎，所以要預留拆卸建築嘅時間，最後唯有決定於今年9月5日正式結束營業。

曾經為無數人帶來美好回憶，如今各因非戰之罪而必須關閉，消失於歷史長河之中，相信唔少人都會為之扼腕。唯有期望「東京台場大江戶溫泉物語」將來能夠異地重建，繼續服務大家。