要數本港嘅Omakase店真係唔算少，其中甚至有米芝蓮三星大廚坐陣的​，但要數歷史悠久嘅話，可能要包括佢 - Tokio Joe。

Tokio Joe係位於中環蘭桂坊嘅傳奇Omakase店，自1995年開業，至今已經有26年，佢出名到「萬人迷」碧咸黎到香港都要去食，而本地嘅各路明星亦不時出現於店內，足以說明佢嘅受歡迎程度。

同普遍嘅Omakase店唔同，Tokio Joe全店並唔係得10幾個Bar位對住廚師個種，亦唔會要好安靜好拘謹咁等食，你可以同朋友一路食一路吹水，完全可以好relax咁食。

而其實餐廳名Tokio Joe最初嘅創作靈感源自衛藤健(Ken Eto)，佢亦都被稱為Tokyo Joe，係一名日裔美國黑幫分子，曾為一個名為Chicago Outfit嘅犯罪集團從事賭博活動。而餐廳團隊於今次革新中以這位真實存在嘅人物以及1950至1960年代的日本為創作意念，以賭博及黑幫的元素為Tokio Joe創造出全新嘅外觀，從而提升其speakeasy嘅神袐感。

講番食物，Tokio Joe除左Omakase之外，亦可以單點其他食品，好似刺身、壽司、卷物、前菜、天婦羅及熱盤，入得黎餐廳有陣時都想自己揀下嘅，正所謂有得揀你至係老闆呀麻。

其實Tokio Joe基本上樣樣食物都好掂，而白肉嘅魚生刺身尤其出色，其滑不溜口同時鮮甜爽口嘅口感真係一絕，令一樣食到上天嘅絕對要數燒鱸魚，其肉質嫩滑到癲，佢因為被火迫出黎嘅魚油亦非常香濃，實在係食到停唔到！

除左野食，如果你點左Sake嘅話，餐廳亦別出心裁比你自己揀唔同嘅Sake杯用，每一隻都非常吸睛，岩晒黎打卡！