相信每位賽車遊戲愛好者，一直都好希望會有隻Game可以用香港做背景，而呢一日終於嚟啦！以真實還原現實場景聞名嘅開放世界賽車遊戲《Test Drive Unlimited》，今日公開最新預告片，宣布新作舞台設定喺香港，以1:1真實比例還原香港島，預計2022年9月登陸PC、PS4/5、Xbox One/Series以及Switch多個平台。

據了解，玩家將會駐紮喺一棟位於維園嘅虛構摩天大廈「太陽能酒店（Solar Hotel）」，參加各類型比賽、駕駛、運送、護送任務。遊戲設有兩大陣營，分別係優雅又奢華嘅精英階層「Sharps」，同埋充滿街頭及地下文化嘅「Streets」，玩家需要選擇加入其中一方對抗敵對陣營，並會因應選擇而獲得唔同嘅車同服飾。由於官方情報有限，所以都未清楚具體劇情係咩，但到目前為止已確認有法拉利、林寶堅尼、保時捷、Koenigsegg、Apollo、Bugatti、Range Rover多部名車可以揸。

資料來源：testdriveunlimited、gtplanet