《生化危機 村莊》自今年5月推出以嚟，一直有人表示PC版會經常出現「疾機」情況，相反家機版本就冇呢個問題，令唔少PC玩家感到苦惱。最近有玩家就上載咗一條「Steam正版 vs 盜版」嘅比較影片，發現盜版遊戲畫面竟然比正版更加順暢，真係好似某富豪話齋「假貨質量比真貨好」。

從對比影片可以見到，大部時間盜版幀率都高於正版，能夠穩定以60Fps運行，甚至某啲場景仲會高於正版近40Fps。遊戲破解團隊EMPRESS就表示，因為CAPCOM喺PC版《生化危機 村莊》所用嘅防盜機制Anti-Tamper V3同埋版權保護軟件Denuvo會大幅影響遊戲效能，所以盜版先會比正版順暢。

雖則盜版比正版順暢，但絕對唔應該支持所有盜版行為，而且盜版遊戲可能會有電腦病毒，造成玩家個人資料外洩，甚至偷偷地植入挖礦程式，等電腦無意間幫黑客挖礦。更何況就係因為盜版行為猖獗，遊戲商先犧牲遊戲性能加入各種防盜機制，如果冇人玩盜版亦都唔會有今次事件。對此，CAPCOM發言人就表示公司已經著手調查PC版性能問題，希望佢哋可以諗到點防盜得嚟又唔影響遊戲性能啦，咁樣對日後推出嘅遊戲都有處。