「爭咩呀爭，溝埋黎做瀨尿牛丸呀！笨。」瀨尿牛丸就無啦，但將餐廳同食材店溝埋黎做嘅就有一間，佢就係位於上環充滿歐陸風嘅Meat The Sea。

一進入Meat The Sea就係佢嘅食材店，你會感覺得到好重嘅歐陸風味，而行上一層樓梯就係佢地嘅餐廳，開房式嘅廚房令你可以一路睇住創辦人兼主廚Patrick Verhoeven點樣駕輕就熟烹調一道道美食。

Meat The Sea都會選取歐洲最時冷嘅食品空運到港，餐廳旗下含有超過70款菜色供客人選擇，其中招牌菜包括：克勒斯荷蘭生蠔、荷蘭鯡魚配生洋蔥酸瓜、白酒蒸荷蘭鮮青口配雜菜、北荷蘭蒙達濃味芝士黑松露雜菌寬扁麵配火箭菜沙拉、龍蝦海鮮湯等等，款款都充滿歐洲味道。

當你品嚐完咁好食嘅菜式，而你又想番屋企試下大顯身手，咁就岩晒，因為餐廳下層嘅食材店就可以選購所有你喺餐廳食得到嘅食材，完全係一次過滿足你兩個體驗。

Meat The Sea主廚Patrick出生於荷蘭，由於其父母喺佢細個已經從事家族餐廳生意，所以好早就對煮野食好有興趣，其後到過多間餐廳工作學習，並於米芝蓮2星餐廳 de Swaen run by Cas Spijkers 工作嘅時候，遇上伯樂 Mr. Spijkers，從中Patrick受其啟發廚藝日益猛進。

23歲嘅時候Patrick已經開立自己首間餐廳，幾年後佢又同妻子喺荷蘭阿姆斯特丹開第二間餐廳，最後於2012年決心將歐洲傳統海鮮風味引入香港，成就Meat The Sea嘅美味。