對好多人嚟講，每次提到IKEA第一時間諗起嘅唔係傢俬，反而係佢哋嘅「瑞典肉丸」，繼而腦入面即刻浮現嗰股濃烈嘅香味。最近美國IKEA為慶祝「IKEA Family 家庭計畫」（香港暫時未有）成立10周年，專程製作神祕禮盒「IKEA Store in a Box」，旨在將店內感官體驗收納喺一個盒仔入面，其中就包括HUVUDROLL肉丸味蠟燭。

只要點著杯蠟燭，全屋好快就會散發住熟悉嘅肉丸味，除咗會令人流晒口水之外，仲可以令你諗返起參觀IKEA嘅回憶。

有趣嘅係，肉丸味香氛蠟燭只係神秘禮盒其中一件產品，唔知盒內仲會有咩意想不到嘅禮物呢？可惜呢個禮盒只限美國IKEA Family會員參加抽獎活動獲得，有興趣嘅朋友可能要拜託下身處美國又有Join相關計劃嘅親朋戚友啦。