講到童年橫向射擊遊戲，除咗經典嘅魂斗羅之外，當然唔少得SNK喺1996年推出嘅《Metal Slug（越南大戰/鋼鐵蟲師）》系列，仲記得細個嗰陣使咗N個1蚊先爆到機（我相信在座有唔少師兄可以$1爆機）。事隔多年，早前SNK就宣布推出全新作品《Metal Slug Tactics》，有別於傳統玩法，改用戰棋回合制模式重現經典角色。官方尋日就出咗條最新Gameplay，唔知大家睇完有冇興趣入手回味一下呢！

玩家可以喺遊戲入面操作Marco（白色頭巾男）、Tarma（黑超男）、Eri（金髮女）以及Fio（Cap帽女）等經典角色，當然唔少得坦克車SV-001同步行機甲SVX-15D，遊戲預計喺2022年登陸PC及Switch平台。