訓覺訓得夠好緊要，研究顯示，如果每日訓少過6個鐘，中年過後大腦失能機率會顯著增加，患老人癡呆症機會大增三成，所以燃燒青春係可以，但人到中年就一定要訓夠訓飽，否則打幾多麻雀都唔夠，好大機會日後有老人癡呆症！快快叫你朋友們早抖啦！

現代人不乏衣食，但就缺乏睡眠，如果人到中年都唔好好訓足，恐怕你老左就會有更大機會患上阿茲海默症（Alzheimer's disease）又叫認知障礙症即老人癡呆症！根據《JAMA Neurology》期刊研究分析左4417位平均年齡71.3歲的老人家後發現，睡眠時間會影響大腦健康。研究中報告每晚睡 6 小時或更短的人 β-澱粉樣蛋白升高，大幅增加患認知障礙症風險。研究人員實際評估睡眠不足的老人家認知能力發現，包括定向、注意力、記憶力、語言和視覺空間技能的表現都較差，並發現患有輕度癡呆。但睡眠過多或每晚訓超過 9 小時的人出現較低的執行功能 (Executive functions)，但這些人的 β-澱粉樣蛋白水平並未升高。

β-澱粉樣蛋白係一種係正常腦細胞活動期間產生的蛋白質，亦是認知障礙症進展過程中最早可檢測到的生物標誌物之一，隨著年齡增長，澱粉樣蛋白斑塊更容易出現。當患者患有認知障礙症時，患者檢索、處理和儲存資訊的腦細胞會退化並死亡，科學家認為澱粉樣蛋白好可能係罪魁禍首之一，呢種蛋白質的積累可能會破壞腦細胞之間的交流，最終殺死腦細胞。

雖然研究人員無法搵到相關因果關係的證據，但幾乎確定睡眠不足會影響大腦功能。刊登於《自然通訊》期刊的研究對近 8 千人進行 25 年追蹤調查發現，同每晚訓夠7 小時的人相比，50 歲和 60 歲中年人睡眠時間如果唔超過 6 小時，患老人癡呆症風險會增加 30%。所以我地提醒大家人到中年，青春都燃燒得七七八八，就唔好再學人通頂唔訓，盡量保持訓得夠健康睡眠，而且應該將睡眠視為與飲食及運動一樣重要的健康生活方式。