雖然《旺角卡門》係王家衛首部執導作品，但憑住獨特影像風格及鏡頭調度，鋒芒初露即獲唔少影迷賞識。劇中主演張學友更憑出演「烏蠅」一角獲得金像獎最佳男配角殊榮，佢嘅經典對白「吔屎啦你！」、「寧願做一日英雄，都唔想做一世烏蠅！」更成為影迷朗朗上口嘅金句。事隔30多年，最近寰亞電影特別推出4K數碼修版畀大家重溫經典，唔知各位有冇興趣睇4K版「吔屎啦你！」個幕呢？

1988年公映嘅《旺角卡門》由當年人氣偶像劉德華、張曼玉、張學友主演，幕後更有張叔平擔任美術指導以及後來拍出《頭文字D》《無間道》系列嘅劉偉強掌鏡。除咗叫好又叫座，更分別入圍第25屆金馬獎及第8屆香港電影金像獎總共12項提名，最終贏得「最佳美術指導」（張叔平）和「最佳男配角」（張學友）兩項殊榮。另外電影入面嘅主題曲及多首插曲，例如王傑《忘了你忘了我》《你是我胸口永遠的痛》、劉德華《痴心錯付》、林憶蓮《激情》亦成為膾炙人口嘅金曲。

怕大家已經唔記得咗劇情，所以順手同大家文字重溫一下。電影故事講述希望揚名立萬嘅古惑仔「烏蠅」（張學友飾）一直視大佬阿華（劉德華飾）為偶像，兩人情同手足喺旺角街頭打滾多年。不過出道較早嘅阿華早就厭倦咗呢種打打殺殺嘅生活，但為咗睇住衝動好勝嘅「烏蠅」只好見日過日，甚至將「烏蠅」惹嘅禍都攬晒上身，亦因為咁而同同門手足Tony（萬梓良飾）反目成仇。後來有日阿華表妹阿娥（張曼玉飾）因為要去旺角睇醫生而暫住喺阿華屋企，兩人逐漸互生情愫，令阿華下定決心金盤洗手，不過因為好勝嘅「烏蠅」偷偷地接咗單自殺式任務，令阿華迫不得已重操舊業拯救「烏蠅」。