曾執導《狗咬狗》、《軍雞》、《意外》嘅鄭保瑞導演，回歸暗黑暴力風格新作《智齒》於海外大獲好評，除咗成為柏林影展「特別放映」單元唯一被選華語電影、相繼入圍世界各地共8個影展，最近仲獲得「第十五屆亞洲電影大獎」四項提名，成為本屆最多提名嘅香港電影！官方喺今日公開最新預告，以黑白影像呈現末世感覺，將於年底以黑白版本上映。

從預告片可以見到，每個角色都一臉不安咁徘徊喺雨水、泥濘以及垃圾堆，其中更閃過好幾個殘肢、裸屍、神像畫面，加上歇斯底里嘅慘叫女聲，令人感受到電影所營造嘅末世氛圍及壓抑。（第一條係舊預告片、第二條為最新預告片）

《智齒》改編自中國知名犯罪⼼理⼩說作家雷⽶同名⼩說，由鄭保瑞執導、《大隻佬》《神探》編劇歐健兒改編、《毒戰》《黑社會》攝影鄭兆強掌鏡，並搵嚟金像影帝林家棟、劉雅瑟、李淳、池內博之主演。

電影劇情講述從學堂畢業的任凱（李淳飾），因一宗連環兇殺案同剛復職嘅斬哥（林家棟飾）開始搭檔關係。不過案子破唔到，反而引發連串事故，其中斬哥就因為重遇殺妻兒嘅街童王桃（劉雅瑟飾），被激發嘅恨意一發不可收拾；另外任凱就大意遺失手槍，被兇手拾獲，而且兇手潛伏於城市之中，危機逐步逼近……