自Switch推出以嚟，一直有唔少玩家反映Joy-con粒蘑菇制會無啦啦「飄移」，令遊戲角色喺冇操縱嘅情況下自動行走，造成極大困擾。近日有外媒就發現任天堂向美國聯邦通信委員會（FCC）提交一份文件，內容顯示任天堂正在開發一款全新Switch手制，唔通可以解決「飄移」問題？

綜合外媒報導，任天堂最近向FCC提交嘅文件顯示佢哋開發緊一款新手制，編號稱為HAC-043，由於過往HAC開頭嘅產品都係適用於Switch（例如HAC-022就係健身環），所以幾乎可以確定呢個手制係畀Switch用。另外亦提到呢個新手制可以透過Switch底座（HAC-002）充電，換言之呢個手制會有一個USB-C接口，不過就因為冇具體設計圖，所以都唔知呢個手制究竟係新一代Joy-con，定抑或係其他特別手制。

所流出嘅FCC文件。（圖片截自：VGC）

其中外媒VGC就猜測，由於HAC-042係任天堂喺上年推出嘅「超任造型Switch手制」，再加上前排有傳任天堂打算將GameBoy及GameBoy Color嘅遊戲移植到Switch，所以呢個新手制都有可能係GB/GBC造型嘅手制，唔係新Joy-con。呢份文件保密期為180日，或者過多半年就會見到新手制問世。

上年推出嘅超任造型Switch手制編號為「HAC-042」