日前聯合國世界糧食計劃署 (WFP) 行政總裁David Beasley公開呼籲，只要首富Elon Musk捐出2%身家（約60億美金），就可以解決地球上嘅飢餓問題，引起網絡一片譁然。不過Elon Musk本人就唔多信呢套說法，要求WFP解釋清楚點樣用60億解決飢餓問題，佢可以立即賣股套現捐錢。

（圖片截自：AP /Jae C. Hong）

日前WTP行政總裁David Beasley接受訪問時，公開呼籲Elon Musk及Jeff Bezos等億萬富豪需要「站出來」，拯救地球上近4,200萬名飽受飢餓嘅人民，仲話Elon Musk其實只要捐出2%身家就可以解決飢餓問題。呢番言論隨即引起各界譁然，試諗下原來首富2%身家，就可以解決咁多年嚟喺電視上見到饑民問題，大家自不然希望Elon Musk能夠慷慨解囊。

之不過Elon Musk就唔多信David Beasley嘅講法，喺Twitter表示如果WFP能夠詳細解釋60億可以點解決飢餓問題，並公開組織會計紀錄，等公眾可以清楚了解筆錢係點樣運用，佢就會立即賣出Tesla股票套現捐錢。目前未知David Beasley所講嘅60億究竟係點樣計出嚟，畢竟喺宏觀層面嚟講，用60億美元解決一個長期存在嘅問題確實好「抵」，但前提係60億呢個數唔係隨口噏出嚟。

David Beasley（圖片截自：cnn）