話說幾日前Netflix公布咗《三體》劇集版首批演員陣容，但由於12位演員冇一個係中國人，而且絕大部份都唔係華裔臉孔，而被中國網民批評毫無「中國味」。就喺今日，由騰訊獨家播映嘅中國版《三體》電視劇就率先曝光首條預告片，唔知大家又會點睇呢？

據介紹，呢部《三體》電視劇由企鵝影視、三體宇宙及靈河文化共同開發製作，並由騰訊視頻於2022年獨家播出，改編自《三體》小說第一部，預計會有24集。演員陣容包括張魯一（飾物理學家汪淼）、于和偉（飾史強）、陳瑾（飾老年版葉文潔）、王子文（飾年青版葉文潔）以及林永健（飾常偉思）等等。

短短3分鐘嘅預告片呈現出多個場景，有紅岸基地、地球三體組織（ETO）、特技同埋一系列生活畫面，但唯獨最重要嘅「三體人」就冇出現。值得一提嘅係，《三體》原著前期故事有住非常濃厚嘅中國背景，甚至出現文革、紅衛兵批鬥等情節，唔知戲集版會刪減咗幾多呢？