近年愈嚟愈多片商開設/擴充自家串流平台，務求喺現今呢個「串流時代」分一杯羹。但身為觀眾，最想當然係畀一份錢就睇晒咁多個串流平台啦，最近就有傳HBO Max同Discovery+將會合二為一！

話說今年5月，AT&T宣布將旗下嘅WarnerMedia拆出嚟同Discovery合併，成立全新公司Warner Bros. Discovery，預計最快2022年完成所有程序。但由於兩間公司本身都有各自嘅串流平台HBO Max及Discovery+，所以當時有唔少人就希望兩者能夠合二為一，咁到時一份錢就可以睇晒全部影視內容。

據外媒Gizmodo報導，日前Discovery高層J.B.Perrette就喺財報會議上提議，當公司完成合併後會提供捆綁式訂閱方案，用戶只要畀一份錢就同時訂閱晒兩個平台，最後甚至會將兩個平台合體成一個大平台。之前Discovery總裁兼CEO亦提過，只少有一半美國Discovery+用戶同時有訂HBO Max，所以都認同捆綁式訂閱做法。

順帶一提，香港係仲未有HBO Max㗎，先前有傳將於今年底推出，之不過依家2022年都嚟緊，咁唯有展望出年啦。你估會唔會佢哋合併完香港都仲未有份呢？