近日網傳遊戲平台Steam，唔再向中國地區提供連線管理伺服器（Connection Manager Server），換言之中國玩家無法以「正常」方式登錄平台。

根據中國遊戲網站消息，所謂嘅CM伺服器，係用於Steam帳號登錄、好友通訊、工作坊等功能，如果相關伺服器關閉，即係代表中國玩家無法用「正常」方式登入Steam同使用上述功能。另外，消息仲提到中國連線伺服器（域名為wmsjsteam.com），目前只可以喺完美世界旗下嘅「蒸汽平台」伺服器列表搵到，似乎有意為全面推廣「蒸汽平台」（即中國版Steam）做足準備。

（圖片截自：Steam Status）

之但係根據Steam Status網站資料顯示，雖然中國3個CM伺服器入面，目前有兩個已顯示停用，但仲有一個位於上海嘅仍然正常運作，所以未有大量中國玩家反映登入唔到Steam。若然最後一個伺服器都摺埋，話唔定中國玩家第時想上網打機就要用VPN（翻牆）或者索性去玩「蒸汽平台」，咁當然除咗Steam，仲有Epic、GOG、Ubisoft等其他遊戲平台可以玩嘅。