雖然Andrew Garfield黎講，2012年嘅《The Amazing Spider-Man》絕對係佢演藝生涯嘅轉捩點，但過去當佢談到該部戲嘅日子時，就曾經用過「令人心痛」黎形容。近日Andrew Garfield再次於訪問中談到《The Amazing Spider-Man》，就話呢部戲令佢「無知的小孩一晚長大」。

圖片：《The Amazing Spider-Man》Via IMDB

Andrew Garfield於2012年出演Sony電影《The Amazing Spider-Man》，雖然論成績不及開創先河嘅Tobey Maguire版本以及目前由Tom Holland主演嘅MCU版 (甚至因為票房不如理想而間接促成《Spider-Man》回歸MCU)，但你睇依家有傳佢會返去客串一下就已經咁多人討論，就知道其實大家對佢嘅版本並不反感。但飾演Tony Parker對Andrew Garfield黎講似乎就係一段非常痛苦嘅經歷。佢近日接受《The Guardian》訪問時話：「我當時真係由一個天真小孩瞬間長大。點解我會覺得拍嗰部戲會係一個單純嘅體驗？」佢反問，附上一個乾澀嘅笑容，「實在有太多利益喺檯面，而利益就主導咗事情嘅發展。成件事非常有警醒性，而且令人心痛」。

圖片：《The Amazing Spider-Man 2》Via IMDB

佢繼續解釋，「喺聖地牙哥Comic-Con中有多已經係成年人嘅男女，佢哋仲保留住當初該角色帶畀佢哋嘅嗰份純真體驗。但當你加入市場嘅能量，突然之間個重點唔再係作品嘅靈魂，而係點樣可以確保大家賺到盡。而我覺得——依家都仲係覺得非常心痛。錢腐化咗所有人，連帶住整個生態系統崩潰，好快就會壓死埋我哋。」

雖然訪問嘅最後Andrew Garfield大笑住打圓場，話佢只係講笑，「仲有好多年先會發生啦」，但我估佢想講嘅係，當片方只係諗住賺錢，而忘記咗作品本身係要帶畀人快樂，咁成個電影文化就真係畀佢哋搞彎哂啦。