相信好多人都鍾意食壽司，甚至鍾意到每個月至少都要食返幾餐，但大家又知唔知佢背後嘅故事呢？最近外媒《紐約時報（The New York Times）》一篇專題文章指出，原來令壽司喺美國發揚光大嘅重大推手，係一位頗具爭議嘅韓國傳教者以及佢嘅信徒，而且壽司發源地亦都唔係日本。

最近外媒《The New York Times》（下稱NYT）以「The Untold Story of Sushi in America」為題撰寫一篇報導，詳細講述壽司喺美國普及嘅過程。文中提到其實80年代嘅美國，好少人知道咩叫拖羅（Toro）或廚師發辦（Omakase），直到備受爭議嘅韓國統一教創始人文鮮明出現...

文鮮明

統一教創始人文鮮明聲稱16歲嗰年嘅復活節，登山期間見到耶穌基督顯現，要求佢「繼承未完成的救贖工作」，自此就立志拯救人類，長大後於1954年創立「統一教」，融合基督教、佛教、薩滿教多種概念，並喺1968年轉赴日本活動，1972年起轉到美國發展。

統一教舉行集體婚禮

隨住統一教日益壯大，文鮮明亦開始涉足唔同領域做生意，除咗創辦美國報社《華盛頓時報（The Washington Times）》，另外又創立大型海鮮食品批發商「True World Foods」。時至今日，後者已發展成最美最大海鮮成品供應商，美國7-8成中高級壽司店食材都係由「True World Foods」提供，除咗美國17州都有據點之外，英、加、日、韓以及西班牙都有分公司，集團每年收入超過5億美元。

或者你會好奇文鮮明係韓國人，點解會咁熟壽司生意嘅呢？NYT就提到，統一教早期嘅70位信徒大部份都係日本人，其中一位叫Takeshi Yashiro嘅信徒更擔任過「True World Foods」CEO多年，相信今時今日嘅成功，當年班「元祖」日本信徒確實功不可沒。

除此之外，文中亦提到壽司並非源自日本，而係中國或東南亞，就如同稻米、鐵器、漢字一樣，喺千幾年前當成「貢品」咁傳到日本，而且起初嘅壽司都唔係生嘅，飯同海鮮都經過醃製，有時仲會用上鹿肉或野豬肉，但經過多年演化，大約從江戶時代開始，逐漸變成依家經常見到嘅手握壽司模樣。