耐唔耐網上就會有人討論「如果只可以帶x樣嘢流落荒島，你會點揀？」，認真嘅朋友當然會答火機、刀、繩等實用工具，但如果大家同我一樣睇過Tom Hanks嘅《劫後重生（Cast Away）》，應該都會即刻諗起排球！最近呢位荒島求生好夥伴Wilson，就成功喺拍賣會上以驚人23萬英鎊（約240萬港幣）高價賣出。

據賣方Prop Store介紹，原本個排球其實係米白色，但出於劇情需要而經過舊化處理，而且正面仲有一個棕紅色嘅「臉孔」，頭頂被扯開插入一堆雜草（正確嚟講係tobacco stalks）模仿頭髮，並因為Wilson拍攝期間長期浸喺水，所以外觀同臉部細節都得比較扭曲同模糊。原本Prop Store預期成交價大約4-6萬英鎊，點知最後賣到去23萬驚人高價，睇嚟買家都係一位超級影迷。

《劫後重生》講述Tom Hanks因飛機失事流落荒島，並從散落四周嘅包裹入面搵到一個排球。孤獨嘅Tom Hanks就喺排球上畫出「臉孔」並將佢命名為Wilson，自此成為Tom Hanks唯一嘅傾訴對象兼密友，可惜最後坐木筏逃出荒島時，Wilson意外墜海，眼見好友愈漂愈遠Tom Hanks傷心欲絕大喊，成為電影史上經典一幕。