由Riot Games開發嘅《League of Legends（英雄聯盟）》，唔經唔覺已經問世10年有多，為咗將整個IP延續落去，近年Riot積極推出各種衍生作品，就好似近排好紅嘅動畫影集《Arcane（奧術）》，電話版LOL《Wild Rift（激鬥峽谷）》以及卡牌遊戲《Runeterra（符文大地傳說）》等等。而官方亦喺日前公開一款格鬥新作《Project L》遊戲畫面，唔知大家有冇興趣呢？

早喺2019年《League of Legends》十周年嗰陣，Riot就曾經透露未來將會開發三大新作，分別係射擊遊戲《Project A》、神秘遊戲《Project F》以及格鬥遊戲《Project L》，前兩者暫時未有消息，但官方日前就率先曝光《Project L》遊戲畫面及概念影片。

從片中可以見到遊戲嘅對戰模式、玩法、場景設計、美術風格都已經定好晒，當中更展示出幾位英雄實際嘅對戰畫面。角色嘅連技基本上都係參照返原著設定，例如Ekko（艾克）有時間倒流能力可以翻返去影子，Darius（達瑞斯）可以用斧頭拉敵人埋身等等。但可惜遊戲仍處於開發階段，製作團隊亦講到明唔會喺2022年上市，不過會喺出年公布更多消息，有興趣嘅朋友再期待一下啦。

資料來源：riotgames