喺呢個連片都可以用美顏filter嘅時代，一早已經冇咗「有圖有真相」呢支歌仔唱，事關唔少人影完相都會「大執」一輪先放上網，更何況依家有N款執相Apps，即使唔識用Photoshop都可以幾下手勢將包包臉變V臉，排骨仔都可以變大隻猛男。正因為呢股風氣，最近一班法國小姐候選佳麗「見真章」嗰陣就引嚟網民批評，投訴官方照同社交平台嘅相完全判若兩人！

Emma Renucci（圖片截自：leparisien）

Lolita Ferrari（圖片截自：leparisien）

Hayate El Gharmaoui（圖片截自：leparisien）

最新一屆法國小姐（Miss France）決賽將於12月11日舉行，日前主辦方就公開29位候選佳麗官方照片，結果引起網絡熱烈迴響，有網民表示多位佳麗嘅官方照同IG嗰樣完全唔同，質疑佢哋平時執相究竟有幾重手，不過都有人覺得就算佳麗們唔用filter，仍然都係美麗動人。

部份參賽佳麗官方照。（圖片截自：leparisien）

主辦方收到眾多投訴後，前法國小姐兼比賽總監Sylvie Tellier就表示，希望參賽佳麗唔好過度修飾自己嘅相，否則會失去觀眾嘅支持，而且間唔時仲可以Post下素顏嘅相。

上屆法國小姐冠軍Amandine Petit（圖片截自：IG@amandinepetitoff）

而上屆法國小姐冠軍Amandine Petit亦警告（提醒）一班後輩，佢哋參加緊嘅係法國小姐比賽，並非Instagram比賽。又解釋主辦方上載未經「修飾」嘅官方照，係出於樹立典範，強調真實美，所以奉勸各位佳麗最好就忘記晒嗰埋執相Apps，事關修飾太多嘅話，只會令Fans見到真樣嗰陣會失望。