歷年嚟彈出彈入多次，話退又唔係真係退休嘅動畫大師宮崎駿，日前接受《紐約時報》專訪時透露將會回到吉卜力工作室，重出江湖製作長篇新作《你想活出怎樣的人生（君たちはどう生きるか）》（暫定）！

雖然宮崎駿喺2013年宣布過《風起了》係佢封鏡之作，之後唔再拍長篇動畫，之不過呢位熱愛動畫嘅老人家又點捨得咁快「真」退休呢？佢最近接受《紐約時報》訪問嗰時，就透露過去呢四年都醞釀緊一部連名都未定嘅新作，目前只知道係改編自宮崎駿童年時熱愛嘅一本小說《你想活出怎樣的人生》，至於新作會唔會用返原著名稱，宮崎駿就話佢自己都未有答案。雖然宮崎駿成日彈出彈入，但考慮到佢老人家已經80歲，今次應該真係封鏡之作，大家一齊嚟期待一下。

《你想活出怎樣的人生》係日本作家吉野源三郎於1973年所寫嘅一本小說，曾改編成漫畫，講述父親離世、出身自小康之家嘅15歲中學生「哥伯尼」喺舅父嘅引導下探索友情、貧富、欺凌、勇氣等問題，從而帶出「人的價值」。

資料來源：紐約時報、CNET