時隔3年有多，新垣結衣終於再拍戲啦，同時亦係佢婚後第一部作品。今次佢將會飾演新入職老師，聯同幾位童星共同出演奇幻作品《GHOSTBOOK おばけずかん》，預計2022年7月於日本上映，官方喺今日就率先曝光首條預告片。

據介紹，電影由《三丁目之黃昏》導演山崎貴執導，新垣結衣及《要聽神明的話》神木隆之介共同主演，改編自日本超人氣鬼怪題材兒童讀物《おばけずかん》，講述一班小朋友意外獲得一本能夠實現任何願望嘅書「GHOSTBOOK」，繼而展開一場奇幻之旅。原著小說累計發行量超過110萬本，又被稱為「大人唔知道嘅暢銷書」，暫時未知香港會唔會上映。