Marvel年度壓軸之作《Spider-Man: No Way Home（蜘蛛俠：不戰無歸）》喺幾日前終於正式上映，仲未睇嘅朋友係咪都打算呢個禮拜去睇呢？日前香港著名玩具品牌Hot Toys繼推出蜘蛛俠（Integrated Suit）後，再推《No Way Home》另一位重要角色奇異博士1：6比例珍藏人偶！

據官方介紹，本作高約31cm，全身共有30多個可動關節，能夠忠實還原奇異博士各種施法動作。並按照原版戲服質感、紋理、剪裁比例等，精細還原富有濃厚東方宗教色彩嘅戰服，而且件魔浮斗篷更內置磁石，能夠固定喺深藍色嘅道服。

另外，隨人偶會配備一個The Box、一個仿石紋魔法台連魔法陣效果 (內置LED發光燈效)、一條魔法鏈墜、兩隻懸戒時空戒指以及13件模仿光環魔法陣嘅配件，結合埋9款唔同造型嘅手掌，就可以擺出多個施法動作，還原電影精彩情節。

《蜘蛛俠：不戰無歸》奇異博士1：6比例珍藏人偶

零售價：HK$1,980

推出日期：約2023年第1季至第2季

資料來源：Hot Toys