日本扭蛋總係創意無窮，最近玩具商TAMA-KYU就推出咗款「噴水馬桶」有趣扭蛋，簡單嚟講就係一個馬桶造型嘅樽蓋，玩家只要將佢扭落去有汽嘅飲品，然後瘋狂咁搖啊搖，一打開個廁板就會呈現出馬桶大噴發嘅效果！據官方所講射程可達2米或以上。

呢款扭蛋玩具主要由ABS（即係膠）及金屬組成，高6.5cm，總共有金、銀、黑、白以及粉紅五隻顏色，大家只需200日圓（約HKD$14）就可以一睹馬桶大噴發嘅場景，若然使用有顏色嘅飲品相信效果會更加有趣。

唔好睇呢款扭蛋玩具好似冇咩用純粹惡搞，但實情廠商就幫佢拍咗條15秒廣告，可想而知佢哋有幾咁重視呢件產品。