相信大家都遇過唔少封面照騙、預告騙，齋睇封面或預告就好似非常精彩，但正片完全唔係嗰回事，甚至有啲鏡頭根本係唔存在（例如Marvel就好鍾意咁玩）。最近有影迷就因為睇完《Yesterday（緣來自昨天）》預告片，見到有「邦女郎」Ana de Armas就租咗嚟睇，點知睇晒成套戲都見唔到佢出現，繼而起訴發行商環球影業。

截圖自《Yesterday》被刪減片段

據外媒《The Hollywood Reporter》報導，上年10月有兩位影迷睇完《Yesterday》預告片，發現「邦女郎」Ana de Armas都有份參演，而且好似飾演某個重要角色，於是就喺串流平台Amazon Prime Video用3.99美元租嚟睇，結果睇晒成套戲都見唔到Ana de Armas，嬲到佢哋起訴環球影業詐騙消費者索償500萬美元。

事實上，Fans們都唔係第一次抱怨Ana de Armas戲份太少，就好似上年嘅《No Time to Die （007：生死有時）》，當時都有唔少網民抱怨點解Ana戲份得咁少，但電影宣傳嗰陣就講到好似係女主角咁。

2019年電影《Yesterday》講述唱作人Jack（Himesh Patel飾）喺一個全球停電嘅神秘晚上，意外被巴士撞傷昏迷，醒返後就發現除咗佢之外冇人認識傳奇樂隊「The Beatles（披頭四）」，於是佢就用Beatles嘅金曲當成自己作品而爆紅。

《Yesterday》Ana de Armas刪減片段。


《Yesterday》預告片。