相信大家讀大學嗰陣都有做過Final Year Project，基本上就即係將你讀大學嗰幾年學到嘅嘢——撇除走堂、溝女、飲酒嗰啲之外——一次過展示出黎。咁如果你大學讀嘅係CG動畫，你嘅Final Project又會係做啲乜？日本一班大學生就整出一條16分鐘長，能夠媲美名牌動畫大廠出品嘅機械人動畫！

呢部動畫名為《果ての一閃》，係一班就讀日本HAL名古屋，「CG、設計、動畫學科」嘅四年級生所創作。劇情黎講其實好簡單，就係人類駕駛人型機械人，對抗唔知喺邊到黎嘅外星勢力「Black Knight」嘅故事，但厲害嘅係動畫中無論人物、機體、特效、配音以至配樂都有極高水準，唔講嘅話你根本唔會知佢只係一班大學生嘅功課！難怪片段一於網上曝光就引起熱議。值得一提嘅係，《果ての一閃》於該校嘅畢業展中獲得最優秀賞，而動畫總監督「@asobo_jp」亦已經搵到工。

更值得一提嘅係，呢集動畫嘅全名其實係《果ての一閃 EPISODE ZERO》，個故仔亦亦明顯地未講完，動畫最後甚至仲有預告，或者不久嘅將來就會見到完整嘅版本啦！