由Tom Holland及Mark Wahlberg主演，改編自PlayStation人氣大作嘅同名電影《Uncharted（秘境探險）》早於上月18日正式上映(疫情關係所以香港冇份上)，截止目前全球斬獲3億美元票房。早前Tom Holland接受YouTube頻道《電癮好選喆》專訪時，就提到劇中唔少動作場面都係向成龍電影取經，而且盡可能親自上陣，同時有兩名專業替身幫手。

隨住電影將於3月14日登陸中國市場，日前成龍就拍片回應Tom Holland：「我知道荷蘭弟的新電影要上映了，還有很多動作畫面呢，是致敬我的電影的，謝謝你[鞠躬]。裡面有爬飛機的，小伙子都是自己親身上陣，很棒很棒，小心 Be careful！」同時表示功夫片迷遍佈全世界令佢非常高興，有機會嘅話都希望能夠同Tom Holland合作一下。

對於成龍嘅合作邀約，Tom Holland微博帳號亦好快作出回應「謝謝你Cheng Long Da Ge（成龍大哥，特登用拼音），若然能夠同你合作將會係我嘅榮幸！」同時不忘宣傳新片，希望所有功夫Fans都會鍾意《秘境探險》呢部作品。雖然呢則回應有可能係公關團隊幫手回覆，並非Tom Holland本人意願，但都唔排除兩人日後有機會合作嘅。唔知Tom Holland有冇聽過「成龍魔咒」呢？