近年奧斯卡頒獎禮收視屢創新低，上年甚至跌到得返985萬觀眾，連前年一半都冇，成為史上最少人睇嘅一屆，不過今年總算有返啲起息！根據市調機構Nielsen統計，昨日舉行嘅第94屆奧斯卡頒獎禮收視比上年激增56%，唔知係咪同Will Smith嗰把掌有關呢？

根據市場調查機構Nielsen統計，今年奧斯卡頒獎典禮錄得1530萬美國觀眾收看，比起去年嘅985萬激增56%，成功打破年年下跌嘅走勢，但可惜仍然係史上第二低收視嘅一屆。

（圖片截自：Los Angeles Times）

對於收視率上升嘅原因眾說紛紜，有網民就認為今屆有返主持所以多返人睇（對上3屆都冇主持人），亦有人認為係頒獎典途中嘅「掌摑事件」令收視人數飆升。無他嘅，相信冇留意開奧斯卡、電影嘅朋友，近日社交媒體都被掌摑一事洗版，網上亦充斥住「Will Smith究竟有冇做錯」等討論，就算你唔知今年邊套戲拎「最佳影片」，但都知Will Smith打咗人一巴。