卻說我為咗玩到順暢60 fps嘅《Elden Ring》，早喺1月就已經掉咗皮幾嘢出黎砌部新電腦，你問題點解唔買平好多又同樣玩到60 fps嘅PS5，因為買唔到囉！而事實證明買唔到嘅唔止我一個、亦唔止香港玩家，就連絕大部日本玩家都買唔到架！

PS5係2020年11月12日正式上市，距離依家已經1年零4個月，正常黎講大部想買嘅玩家都應該要買到、玩緊，但據日本遊戲媒體做嘅調查，近400名讀者，真正買到嘅PS5嘅人只有70個，佔總數18.3%，想買但買唔到嘅人就有290個，佔近76%。淨返嗰22個人 (5.8%)就話自己冇興趣買PS5，不過當中就有人講明，冇打算買唔係因為唔打機，而係覺得唔會買到所以放棄，更有人係好似我咁，實在等唔切就轉投PC嘅懷抱。

圖片：Inside-games.jp

2021年7月時，SONY就宣佈於全球賣出1000萬部PS5，銷售速度與當年PS4推出時差唔多 (2013年11月首先於北美推出，到2014年8月達到1000萬部)。SONY亦於今年1月公佈，2021年於日本國內賣出約100萬部PS5，同樣與當年PS4差唔多 (2014年2月於日本推出，2015年1月達100萬部)，換言之其銷售速度與當年相比分別不大。咁就令人非常好奇，點解日本本土都仲有咁多人想買但買唔到呢？係多咗好多人想買PS5，定係日本賣出嘅PS5最後冇落於日本玩家手上？