今年60歲嘅著名諧星Jim Carrey，日前為新作《超音鼠大電影 2（Sonic the Hedgehog 2）》宣傳時突然宣布即將退休，表示熱愛悠閒寧靜生活，震驚一眾影迷。

隨住《超音鼠大電影 2》即將上映，於劇中飾演「蛋頭博士」嘅Jim Carrey日前接受外媒《Access Hollywood》訪問，點知傾傾下突然大爆自己即將退休，嚇到記者即時反問「係咪真㗎？」，Jim Carrey就進一步確認「我好鍾意寧靜嘅生活，好鍾意喺畫布上畫畫，好鍾意自己嘅精神活動，我已經拍得足夠多作品，而且相當知足。」

咁係咪永遠都睇唔到Jim Carrey嘅演出？佢就用一個搞笑嘅例子回答：「如果有朝一日有位天使，用某種金墨水去寫劇本，而呢份劇本對世界又非常重要，咁我可能會拍嘅，不過依家我要休息一下。」換言之，如果有好劇本嘅話，佢可能會復出。

於80年代出道嘅Jim Carrey，憑1994年電影《Ace Ventura: Pet Detective（神探飛機頭）聲名大噪，後來更以《The Truman Show（真人Show/楚門的世界）》贏得金球獎影帝，《The Mask（變相怪傑）》、《Bruce Almighty（衰鬼上帝）》等爆笑作品深入民心，但自從患上抑鬱症後就寄情於繪畫，少咗出現喺大銀幕，直到前年「久休復出」加盟《超音鼠大電影》飾演大反派「蛋頭博士」。