隨住《壯志凌雲》續集《Top Gun:Maverick（壯志凌雲：獨行俠）》將於下月26日正式上映，日前官方率先公開幕後製作花絮，講述Tom Cruise為求畫面真實不惜親身上陣揸戰機，同時為全體演員設計為期3個月飛行特訓！

身兼男主角及監製嘅Tom Cruise於片中表示：「我本來冇準備好要拍續集，直到有一個值得拍續集嘅故事，都要等科技更加發達，先能夠更真實地呈現飛行員經歷。」解釋相隔30多年先拍續集嘅原因。同時為求畫面真實，劇組聯同海軍及空軍飛行學校TOP GUN合作，對全體演員展開為期3個月魔鬼特訓，由學習駕駛單引擎飛機，再到L-39教練機及特技飛行，最後就係F-18戰鬥機，以及從航空母艦甲板起飛。而且要學埋水中求生，喺泳池模擬飛機墜入海底時逃出機艙。

除此之外，導演Joseph Kosinski亦表示演員們要學埋操作攝影機，坐入駕駛艙後就要做埋導演，知道點樣打燈同拍攝能夠呈現最佳畫面。

《Top Gun:Maverick（壯志凌雲：獨行俠）》由《Tron: Legacy（創戰記）》導演Joseph Kosinski執導，故事講述服役超過30年嘅頂尖飛行員「Maverick 獨行俠」Pete Mitchell上校（Tom Cruise飾），多年嚟醉心於飛行，不斷挑戰自我極限。後來受命重返飛行學校擔任教官，訓練一批準飛行員執行一項嚴峻任務，期間遇上已故拍擋「Goose 飛鵝」兒子而勾起對已故戰友嘅愧疚，預計5月26日於香港上映。