《Elden Ring》已經出咗兩個月，但熱度依然未減，而國外亦有好多人為遊戲推出各種Mod，令遊戲趣味更上一層樓，甚至唔少人係為咗啲Mod再玩一次。例如呢個由「LovelyLad」創作嘅「性感菈妮」Mod咁，就深得玩家們嘅喜愛。

卻說《Elden Ring》推出後，菈妮作為玩家們嘅「老婆」，雖然本體只係一隻人偶，仲要係一隻全身藍色、有四隻手、大部份時間都著住件大褸包到實嘅人偶，但依然無阻玩家們對其嘅熱愛，網上亦有人為菈妮推出各種二創圖片。其中Twitter上嘅「Cutesexyrobutts」就畫出一隻「性感菈妮」，雖然保留雪魔女帽及大褸，但大褸之下就改為超性感白色內衣，身材亦豐滿咗唔少。張圖本身於Twitter上獲得近14萬個讚好。

而「LovelyLad」就以呢張圖為藍本，設計咗一個Mod，令遊戲內嘅菈妮以呢個造型登場，而且連結局動畫中嘅菈妮都同樣係呢個造形。相信令各位玩家更加心甘命抵去為老婆完成心願。

pic.twitter.com/1TtaL9ziFD

— Cutesexyrobutts (@cutesexyrobutts) April 16, 2022

更值得一提嘅係，「LovelyLad」後續再更新個Mod，玩家可以選擇連件超性感內衣都唔要，除咗頂帽及大褸外「老婆」完全一絲不掛！搞到我都想開返隻Game出黎玩多次！

但對比起外國玩家們嘅興奮，日本玩家就純情得多，唔少玩家見到個Mod都表示原版遮到實嘅菈妮先係最好。各位Elden Lord又點睇？

資料來源：Nexus Mods