Johnny Depp控告Amber Heard案即將完結，不論結果如何，你又支持邊一方，相信唔少人都會同意呢場審訊真係好睇過戲，網上甚至有人討論緊如果呢場審訊真係電影化，演員名單應該有咩人。但喺一切成真之前，外國動畫創作者「Marimomo Morimo」就率先以著名遊戲《逆轉裁判》風格，重現審訊嘅經典畫面。

本來就會製作二次創作動畫嘅「Marimomo Morimo」自上月尾開始將Johnny Depp案件中嘅片段，以《逆轉裁判》風重現，到目前為止已經出咗7條片，以佢簡介中話平時整一條片要幾個月黎睇，呢個月佢應該係犧牲咗大量肝功能黎創作。佢創作嘅7條片都係取材於現實案件中嘅經典場面，例如AH方律師Benjamin Rottenborn多次用一份文件，重複質問JD文件上嘅簽名係咪佢嘅；又或者AH方律師反對自己問嘅問題、JD方證人Alejandro Romero於視像作供時不耐煩地吸食電子煙、AH方律師不停逼問JD方美女心理學家Shanning Curry是否有拎鬆餅畀AH食、以及JD前保安否認有見過JD下體等。

本身就已經頗為荒謬嘅審訊，配上《逆轉裁判》風嘅畫面音效，令整件事嘅喜感大幅上升。不過按Maromomo Morimo目前嘅進度，如果佢要講哂成場審訊，應該都仲需要一段時間。